Fai ‘e Siosiua F. Lafitani Tofua’ipangai
HE ‘OIAU E HOKU FAKAPO!
Kou tangilaulau mo ‘eku taofai
Ke fakamahino ki hau’atea ‘a hoku loto mamahi
Kou tangilaulau mo ‘eku taotala
Ke fakamahino ki hau’atea ‘a ‘eku faingata’ia
HE ‘OIAU E! ‘OIAU E!
Kou tangi mo hifi hoku sino ‘aki ‘eku taofai
Ke fakamahino ki hau’atea ko e to’a tu’ukimu’a ‘oku ‘e’epa ni
Kou tangi mo hifi hoku sino ‘aki ‘eku taotala
Ke fakamahino ki hau’atea ‘oku hala ketau to e fakatauhoa
HE ‘OIAU E HOKU FAKAPO!
Kou tangi mo haha hoku mata ‘aki ‘eku povai ualulu
Ke fakamahino ko hoku toto kou faka’apa’apa’aki
Kou tangi mo haha hoku mata’aki ‘eku povai tui tapavalu
Ke fakamahino ko hoku toto kou tukulolo’aki
HE ‘OIAU E! ‘OIAU E!
‘Oi au e mo’ungalaulau mo nifo’osi e!
‘Oku mo ‘i fe he ‘aho ni!
Ko e ‘aho e mo e po ‘eku tangi lau’aitu
‘Oiau e mo’ungalaulau mo nifo’osi e !
‘Oku mo ‘i fe he pooni!
Ko e po e mo e ‘aho ‘eku tangi lau’aitu
HE ‘OIAU E HOKU FAKAPO!
‘Oiau e te u tangi lau’aitu e!
Te u tangi lau’aitu e!
He ko hai ha taha ne alea mo ia?
‘I tahi, ‘uta pea ‘i funga ma’olunga?
Ko au e!
Ne ‘ikai ke u lava ke alea mo ia
He na’e ‘i sia mo kolonga hono povai
Pea fakatoukatea he sika ke oma ho’ona tao
HE ‘OIAU E! ‘OIAU E!
Ko hai ha taha ne alea mo ia?
Teu mate au keta o pe
Te u mate au keta o pe
Ki Pulotu mo hono ‘ea
Pea kia Havea Hikule’o
He kuo to ‘a e taufa ni ho fale
Ko e fale ‘o e to’a ‘i he ope
‘E ‘ikai te ke ngalo ‘iate au
Ki he pa’angangalu ‘i he pa’angangalu
HE ‘OIAU E FAKAPO!
Ko ha fa’u ‘ena ke fakaofiofoi ‘i he fa’ahinga “tangilaulau fakasipitau” (he’eku fakahingoa ‘e au) ne fa’a fai ‘e he kau to’a Tonga ‘i ha pekia ha to’a pe ‘eiki ne anga fakato’a ‘o loto lahi mo ta’efie’auna ‘i he lolotonga ‘a e tau fakalotofonua ‘a Tonga he senituli 18 ki he 19.
Ko ha tangi laulau ‘ena ‘a ha to’a ne hoko ko ha fili lahi pea ‘ikai va lelei ia mo e pekia he’ene kei mo’ui. Ko ha tangilaulau ‘ena ‘a e to’a kei mo’ui ki he sino ‘o e to’a kuo pekia. Ne talanoa lahi ‘a Mariner mo ha ngaahi talatukungutu kehe pe ki hono haha mo e hifi ‘e he kau to’a honau sino ke tafe toto ‘i mu’a pe he pangai ‘o e me’afaka’eiki ‘o ‘Ulukalala Feletoa ko ha fakaha ‘enau faka’apa’apa mo e tukulolo ki he pekia ‘a e to’a lahi.
Ne pehe ‘e Mariner ne fakalilifu ‘a e ngaahi tangilaulau pehe ni, ka e anga fakasipitau. He na’a nau tangi laulau’aki mo ‘enau ngaahi tao mo e povai ‘o haha’aki honau ‘ulu mo hifihifi ‘aki honau sino ke fetoto’i ko e fakaha ‘enau faka’apa’apa mo’oni ki he pekia.
Ko e to’onga faka’apa’apa ia ‘a e kau to’a ‘i ha hoko ha pekia ‘a ha to’a pe ‘eiki lahi ne to’a, pea ne tatau ai pe pe na’a nau faha’i, pe hoko ko e fili, mo e sino ‘o e pekia he’ene kei laumalie pe mo’ui, ne ‘ikai pe ha to e kehekehe ia. Ne nau fai pe me’a tatau he’enau faka’apa’apa faka’osi ki ai pea toki telio. Pea neongo ‘oku ha fakalilifu hange ko e lau ‘a Mariner ka ‘oku ai ‘a e ngaahi me’a lahi ‘i heni ke fai ki ai ha to e fakatototolo mo ha potatala he kaha’u.
‘Oku ui ‘ena ko e “tangilaulau fakasipitau”, pea ‘oku fakafaikehekehe’i pe ia mei he “sipitau” mo e “tangilaulau”.
