Ko ‘eni e Laumālie ‘o ‘Ilaisiaá
Misiona’aki ‘e he Uho Tongá
Ke fakahoko e lau mo hono aká
Koe’uhi ke failau mo to’ulu hono fuá
Telia e pikilau ‘o taimi faka’au ‘o pupuivá
Hangē ha pōpao kuo tēkina ‘ikai hano hamá
Faka’ānaua e kau Paionia ‘o ‘aneafí
Fakatetu’a ki ha to’utangata ‘o e ‘aho ní
Pukepuke-’a-fufula tukulaumea ne faí
Koe’uhi ko e siasí, fonuá mo e fāmilí
Ke māfana mo tolonga hano paotoloakí
Ngafa ke tu’utai, hangē ‘oku nau kei mo’uí
Manatu hoku ‘atamai kia ‘Epalahamé
‘Auhē ‘a Sekope ‘ene fānau ‘i ‘Isipité
‘Oka lau ta’u pea taumama’o ‘o lauiafé
Ka ‘i he ‘eku manatu, ko ‘aneafi peé
Ne’ine’i ke tali ‘a Līhai he toafa mamaé
Nīfai mo e lekooti, a e kāpasa mo e mapé
Ungafonua si’i kau mateaki kuo tō taú
Kala ‘iloa kotou tupu’anga he ‘eku manatú
Hoha’a e loto pea ‘alovili ke kau he laú
Faifeinga ke tauala he ‘ō’ōfaki e fānaú
Lifusia e ‘amanaki he taufa kuo tu’unukú
Ka neu tulemohe ‘i namo he taimi ‘o e tofú
Ko koe mo au e fatongia ‘o e uhó
Ke fakahoko e ‘aneafi mo hotau hakó
Sia e kupenga-’o-taimi ‘aki e fakapotopotó
Pea pena mo monomono’aki e mahinó
‘O tui e kakala he falahola mo e paongó
Kae ‘oua na’a ngalo ‘a e aka mo e uhó
Ko ‘eni e Afo Koula ki he pā’angangalu e nofó
‘Ko ‘eni hoku naunau’ ‘ai ke tukufakaholó
Fa’u ‘e Fatusiaola ‘i Mē 2006. Ko e maaú ni ‘oku folaloa ai e taumu’a ‘o e Uho Tonga Historical Society.
