ASB POLYFEST 2008
‘Apiako Epsom Girls Grammar School
Kaveingá: “Te Tau Lava ‘o Ikuna ‘Etau Misí he Funga ‘oe ‘Ānau, Tui moe Ngāue”; Faivá: Tau’olunga; Ta’anga: “Pea ‘Ekinusitā ‘Eti ‘Akusitā: Fou He Faingata’á Kihe Ikuná”; Fakafatu: Dr ‘Okusitino Māhina.
“Pea ‘Ekinusitā ‘Eti ‘Akusitā:
Fou He Faingata’á Kihe Ikuná”
1.Tala mo kapui moe matangá
Moe kātoanga ē kuo hu’ekiná
Ke he’aki ha tuē pā ha mavavá
Langi mai teine keta fola haká
2.Tala ‘oe ako he me’a funganí
‘Eta ‘ānau moe tui ke ngāue’í
Koe fakatonu’anga si’eta misí
Koe tatau mo’oni ‘oe ‘ekuasí
3.Haere mai kau taki mamatá
Lei Filimeni koe ‘aati senitā
Moe ‘atitōliume ko Lētī Fisá
‘Episomu Holo moe ‘akuātiká
4.Kei tu’u ‘ae Māsuli ‘Atemisí
Kae fēfē ‘alā ‘a hono laipelí
Fili mo toli he ngaahi supiesí
Matematika ‘āati moe saienisi
5.Ko si’eta moto ē keta tulifuá
Pea ‘ekinusitā, ‘eti ‘akusitā
Fou he faingata’a kihe ikuná
Ma’u pē mā tama he kakavá
6.Kuo lava si’ete fakamalingá
Kau liu ange kihe Hala Silivá
Mo hono laione le’o fono koulá
Teu mate ai koia ‘eta misioná
Fakamatalá: Kupu 1, Ko e tala fakatapu ki he matangá, ‘o fekau’aki mo e ‘aho kātoangá pea mo hono ‘alungā, ‘a ia ko hono laumālie ko e ma’alali mo e fiefiá; Kupu 2, Ko e tala fatongia ki he kaveinga ‘o e ‘ahó, ‘oku makatu’unga he ikuna ‘o ‘etau misí fakaakó ‘i he funga ‘o e ‘ānau, tui mo e ngāue, ‘a ia ko e tefito ia ‘o e kaveingá; Kupu 3-5, Ko e tala ‘uhingá, ‘a ia ko e ni’ihi ia ‘o e ngaahi mātanga ‘iloa ‘o e ‘apiakó, ‘o hangē ko hono ngaahi falé mo e laipelí, ‘a ia ‘oku fa’o ai ‘a e fakakaukau fo’ou, loloto mo mālie ‘o e sivilaisé he ngaahi tohi, pea hiliō ‘i hono motó he lea faka-Latiná, per angusta ad agusta, ‘o ‘uhinga faka-Tonga ko e fou he faingata’á kihe ikuná; mo e Kupu 6, Ko e tala aofangatukú, ‘a ia ko e tatau ia ‘a ‘Episomu ki he kātoangá he kuo lava honau ngafá ka nau foki ki honau lata’angá he Hala Silivá, ‘o hokohoko atu ‘enau fai fatongiá mo fakama’unga ki he’enau lokó, ‘a ia ko e laione fonofono koulá ‘oku nau mo’ui’aki mo mate ai he’enau akó.
