Planet Tonga - Language Journal - Tefua ‘a Vaka Lautala » “KOE PATALONI ‘OE KAU PATALONĺ”

February 2008
S	M	T	W	T	F	S
« Nov
	1	2
3	4	5	6	7	8	9
10	11	12	13	14	15	16
17	18	19	20	21	22	23
24	25	26	27	28	29

Fakafatu: Hūfanga Dr ‘Okusitino Māhina
‘Api-ko-Lavengahau, Taulanga-Tuku-mo-Failā
Tamakimakaurau
Aotearoa Nu’usila

KUPU I – TALA FAKATAPU:

Tapu moe Tu’iha’amo’ungá
Koe fuatapu ‘o Lalo mo ‘Utá
‘Ae tivaini moe hautoká
Ako moe lotu ne fakahakeá
‘O vakavakaō ko hota tofi’á
Felavai ē maama moe ‘ofá
Koe ‘esiaola ‘ae nimamea’á

KUPU II – TALA FATONGIA:

Tupou Kolisi ke fanongo maí
‘Ae mu’aki to’u moe muiakí
Taha’i ongoongo kuo pavakí
Āngai ē matangi pea pōpō’ulí
Tupu’anga ‘eta fāfākongatahí
‘Ūfia ē huelo koula ‘eta pēkoní
Koe pataloni ‘oe kau pataloní

KUPU III – TALA ‘UHINGA:

Ke pā ha mavava hua ha tuē
Koe ‘aho ‘eni ‘oe fakapuepué
Langiola kuo fai ‘ehe tangané
Kuo ta’imālie ai ‘a Felenité
Fai’anga ‘eta fakatuketuké
‘O ‘iloa ‘a Tonga koe Pilioté
Pule’anga Hau he Tahi Sauté

KUPU IV – TALA ‘UHINGA:

Na’e fanāfotu ‘i fale mo tu’á
Fakatouato he’ene maa’imoá
He ‘akatemika moe ‘ateleitá
Tāvani’aki loumaile maamaloá
Mōtolo kihe kau matematiká
Koia tofu ‘ae hala kihe ikuná
Koe faiekina ‘a mateakili’oá

KUPU V – TALA ‘UHINGA:

‘Oku kei tu’uni he ngaahi tohí
‘Ae tamasi’i ko Tupoumālohí
‘Ene peleiki ē ngaahi lekootí
‘Otu sivi moe ngaahi sipotí
‘I Niuingatoni koe ‘Akatemī
Mo Sitinī koe ‘Univēsití
Maisoa he lao moe kelēsikí

KUPU VI – TALA ‘UHINGA:

He ‘oku kei hiliō si’eta motó
Koe Tonga mo’unga kihe lotó
Ke tauhi ma’a foki pea tasiló
Ka ‘uli mo kele he ‘oi fakapō!
‘E hoatamaki mo si’eta lokó
‘A si’i ‘ungá mo’ui fakaolooló
‘O mohu he ‘ilo moe potó

KUPU VII – TALA AOFANGATUKU:

Lepa-’i-Fualu Sia-ko-Toloá
‘E ngata ‘afē ha’ata ni ‘ofá?
‘Ene malave ma’u pea ma’uná
Kau helohelo ē kau ta’e'iloá
Koe lava ē malangá ANFF
Kau afe si’i ki Puke Tapapá
Fakalongo mai ki si’oto ngafá

Na’e fatu ‘a e ta’anga ni ki he: Fe’auhi Sivi Hiva, Kātoanga Fakamanatu 142 Ta’u ‘o e Kolisi ko Tupou, Fepueli 2008, ‘a ia ko hono kaveinga ko e: Siaosi Tāufa’āhau Tupou IV, La’ā Kuo Ungafonua: Pataloni Mālōlō ‘o e Kolisi Tutuku Kolisi ko Tupou, ma’ae kauhiva: Kolisi Tutuku Kolisi ko Tupou, Va’a SUTT Mo’unga-Kihe-Loto, Puke Tapapa, ‘Aokalani, Nu’usila.