1.Hūfanga he Talamalu e Fonuá
Kae ‘atā ke fai ha viki mei Vaihiloá
Ki he tukutukulaumea ‘a Vaivaipetoá
Lavengamālie ai e vūlangi mo e solá
2.Tala-pea-ngali huli ‘o Maui mei mu’á
‘Oku tā ki fanga pea tā ki vahá
Toutai ola ‘i Langi, Pulotu, mo Maamá
He koe tā mafua ‘ae kanivatu tupu’á
3.Tangane e Tangata ‘o Tufu-’a-Māhiná
Koe pulotu-fa’u ‘oe ta’anga motu’á
Moe pulotu-haka ‘oe lakalaka ‘iloá
‘Oku tafi mala’e ‘i hotau kuongá
4.He koe punake ‘oe faiva tā-vā
Moe tufunga e uho moe fuo ‘oe leá
Lavemonū ai si’i kau ākongá
He takanoa pē ‘i he lalo-hakangá
5.Si’i tangata mo fefine Tonga
Tau hākahaka he tā vā’ifaiva kuo feiá
He kuo mālie fau mo fakaholomamatá
Pea malanga-i-faiva ai e loto māfaná
6.’Io, koe Tā-mo-Vā ia ‘o Ha’a Moaná
Koe tō’ongapō e Lo’au ‘o Tāpinga’amaamá
Ke paotoloaki e ako kelesikale mu’á
Mo tatala e fihitu’u ‘oe lotolotongá
Fatu ‘e Tēvita O. Ka’ili ki he kātonga fakalāngilangi’i ‘o Toketā ‘Okusitino Māhina ‘a ia na’e fakahoko lolotonga e Konifelenisi Fakaako hono 12 ‘oe Tonga Research Association ‘i Nuku’alofa Tonga ‘i Siulai 14, 2007.
